La poesia vincitrice della Sezione A (poesie in vernacolo salentino) per l’anno 2023 è stata la poesia intitolata “La Fica” di Luigia Palma, che ha ricevuto il primo premio, come evidenziato dalla giuria, per “l’attinenza al tema. È stata molto apprezzabile la competenza linguistica, il ritmo e la musicalità; le immagini suscitano emozioni e sentimenti.”
Se l’arbulu te la fica putia parlare,
tinia na storia longa te cuntare,
perciò, cu scriu sta poesia, m’aggiu documentata,
puru ca la canuscu te quannu su nata:
te quannu lu tata meu te fore rrivava
cu li panari te fiche e su la banca li mpuggiava.
Mamma, cu pacienza, le spaccava
e in fila su lu cannizzu le nfilava,
ma quiddhre chiù beddhre le lassava.
Niure, viola e verdi: te tante razze si siccanne,
quannu nun c’era lu pane,
na rancata a fore se purtanne,
te intra a la capasa le scuddhranne
e, cu quiddhre, la sciurnata passanne.
Unnicimila anni a retu, a quai è rrivata,
te la luntana Asia l’anne purtata;
è nu fruttu anticu e apprezzatu
puru nell’anticu testamentu s’ave parlatu.
È simbulu te fertilità, te vita e te gioia,
è l’emblema te la luce, te la forza e te l’opulenza,
è simbulu te pace e te conoscenza.
Aggiu saputu ca puru Romulu e Remu ne annu beneficiatu:
n’arbulu te fica lu cestu ave fermatu,
li gemelli ave salvatu
e, pe tuttu l’imperu, l’arbulu te fica annu veneratu.
Israele pe simbulu sou l’ave scucchiatu
e, se l’ave fattu, lu motivu nc’è statu!
Ieu nu le sapia tutte ste cose,
sapia ca tanta gente ave sfamatu.
Quannu t’estate, te nanzi a na chisura te troi a passare,
cu arbuli te fiche maturate,
cu lu mele ca te fore ncigna a culare:
è nu spettaculu e rittu nu poi passare.
Fermate, guardale, aprile e ssapurale,
mangiate a sutta all’arbulu è tutta n’autra cosa,
la sensazione, ca proi, te face scurdare ogni cosa.
Quarche annu a retu, muti arbuli anne schiantatu,
paria ca l’arbulu te fica te mota era passatu,
te li benefici uti l’ommu s’era scurdatu,
ca, oltre a li frutti, cu le ficaie
li nonni nosci la casa anne scarfatu.
Ma mo se n’ave resu contu e sta cerca cu rimedia,
ma sulamente quannu è rrivatu cu lu culu a nterra.
La fica, pe ci l’apprezza, è comu lu pane
e, quantu ave fattu pe nui, nu ne l’imu scurdare.
Iscriviti al Concorso di Poesia 2024 la prossima poesia vincitrice potrebbe essere la tua.
