La seconda classificata della Sezione A (poesie in dialetto salentino) per l’anno 2023 è stata la poesia intitolata “Festa te nu fruttu nticu” di Marcello Nicoletti, che è stata in grado di “evocare immagini suggestive” come si legge nelle motivazioni della giuria.
Jeu me recòrdu, te vagnòne,
cce festa quandu le fiche rriànu!
Ntra nnu panàru cugghìa le cchiù bone;
me sentìa mèsciu, cu ddhu ndròccu a manu…
Ddhu prodottu tuce te la natura,
pe tanti sièculi, tutti ha fattu bbinchiàre.
Ogne cristianu nci ha ttenùtu ccùra,
e tuttòra lu sècuta a cunzumàre.
A tisfìta cu sirma me mentìa;
le teràmmu cu llu petecìnu, de matìnu prestu.
Però, quasi sempre ìddhu encìa,
ca jeu le mangiàa comu n’animale crièstu.
Rrìanu de la Mesopotamia, de ogne manèra:
longhe, tunde, nìure, russe, jèrdi…
Rròbba ca meritàa la mègghiu uantièra;
quanti àrviri tenìmu, ncè cu tte pièrdi!
A llu Salentu, chisùre ‘ntère te àrviri te fica
tenìmu, e puru a miènzu a lla ulìa
ci ndete àutri, bbenetìca…
Stanu ddhai sira, mmane, e menzatìa.
Rizzèddhe, te Martànu, fiche marangiàne,
fracazzàne, pàccie, russèddhe, uttàte…
Tante le razze ca se mangiàne comu pane,
e ncora òsce ficùranu an tàula jèrnu e state.
La fica mangiata frisca tene tanta qualità,
ma puru cu mèndula e làuru, siccàta,
ete a ddavèru na specialità,
ca putìa fare concorrenza a lla ciucculàta.
Nzòmma, pròpiu na cosa bona cu sse festeggia
stu fruttu nticu, ca sempre s’ha mangiàtu.
Intra le massarèi, e ‘ntra lla reggia,
nu panàru te fiche nu ha mai mancàtu!
Iscriviti al Concorso di Poesia 2024 la prossima poesia vincitrice potrebbe essere la tua!
